Mundart Bloos nidd nòò Rosenheim!

Das waa má schunn klaa, wie isch e klään Bubsche waa: Had jemand vázehld, es hädd „Mord unn Doodschlaach“ genn, das waa gelòò – odder doch schwär iwwertrieb. Dòòmòls had’s jòò noch känn Fernsehn genn unn känn Krimiserie.

Bloos nidd nòò Rosenheim!
Foto: SZ/Robby Lorenz

Wie das Kinner vun heid unn eerschd reschd Erwachsne siehn, wääs isch nidd. Immerhin liwwere allään die greesere Fernsehsender im Schnidd pro Stunn minnischens ääner Mord ins Wohnzimmer, nidd selde ach es Doppelde. Forr nix se saan vun annere Quelle forr Mord unn Doodschlaach. Nur zum Aangugge nadiirlisch, weil: Selwer jemand umbringe odder umgebrung werre, das wolle die meischde Leid wohl doch nidd. Ach forr die dunggelschwazz-bludisch-brudale Krimis kinne se sisch nidd all begeischdere.

Unn forr die, denne selbschd die angeblisch realisdische nidd passe, gebbd‘s schlieslisch Familjekrimis, wo má männe kinnd, es gääng um nedde Leid wie du unn isch. Lossd má auser Achd, dass es beim Umbringe Doode gebbd, kinnd má dòò faschd glawe, Mord wär ebbes faschd schunn Heideres. Isch genn zu: Ääni Serie gugge mir aach alsmòò: Die Rosenheim-Cops. Spield im Freistaad Bayern, der laudhals teend, dòò wär‘s wenischer kriminell wie iwwerall sunschd in Deidschland. Selbschd wenn, heischd das nidd, dass dord gaanix vòrkummd. Das beweise die eschde Zahle forr 2018, gemelld ledschde Mondaa: 180 doode Obfer vun Mord unn Doodschlaach – bei 12,4 Millione Inwohner. Umgeleed uff 323000 in Stadd unn Landkreis Rosenheim gäb das niddemòò finf Doode – odder seid 2001 grad mòò 86. Awwer bei de Cops ware’s in denne 18 Jòhr minnischens 429 Doode, also finf Mòò so vill, wie ne laud Stadisdig zustehn. Bzw. 343 Mòò „Es gabad a Leich“ vun denne die Stadsdig känn Teensche piebsd. Dòò schreibd känn Zeidung driwwer, känn Fernsehmagazin fròòd kridisch nòò. Awwer is es sunschwo annerschd? Nää, egal, in wellem greesere odder kläänere Kaff sisch so e Krimiserie aansiedeld, dòò explodiere die Mordzahle.

De groose Dischder Hölderlin behaubd: „Wo Gefahr ist, wächst das Rettende auch.“ Wenn isch an de Cops ihr Rosenheim unn an die ville Quasi-Rosenheims sunschdwo im Land dengge, glaab isch im Gejedääl: Wo es Reddende is, dòò wachsd unweigerlisch ach die Gefah! Odder?

Also stehd forr misch gans klaa feschd: Bleib im Muschderland Saaland mid seine grad mòò Stigger 39 Tatort-Doode in 49 Jòhr! Vòr allem awwer: Bloos nidd nòò Rosenheim! Na ja, isch hänge hald am Läwe.

Peter Eckert schreibt in
Sabrigger Pladd.

Meistgelesen
Neueste Artikel
Zum Thema
Aus dem Ressort