E Rolltrebb is wie's Läwe
Als Peter Eckert neulich auf einer Rolltreppe mit seinem Einkaufswagen feststeckte, kam er ins Philosophieren.
Wo sinn dòò Rolle? Hann isch misch mid vier gefròòd bei meiner eerschd Rolltrebb in Sabrigge im PK. Se siehn ware nur Stufe. Jòhrzehnde späder ware die aach furd. Má had gelernd: Wo de samd Inkaafswäänsche ruffkummschd, das heischd "Rollgleite". Mir egal! Bevòr mir so e Word die Zung váknoddeld, bleib isch - wie anner Leid - bei Rolltrebb.
Was kam‘má an so me Ding villes lerne! Allään die Leid, wo stehn bleiwe, soball se runner sinn. Dass hinnedraan welsche kumme, is denne schnurz. Wie im Läwe! Odder bei de Eilische, wo fahre wolle unn noch gehn dezu. Wenn se kinne. Links gehn, reschds stehn! Kennd má vum Stròòsevákehr: Reschds paage, dass de annere links kinne vòrbei fahre. Weil‘s uff dá Rolltrebb aach so soll sinn, hängd e exdra Hinweisschild dòò. Halld sisch irjendwer draan? Gudd, mansche stehn reschds unn losse ämm dursch, ob gewolld odder Zufall, wer wääs das schunn? Awwer die meischde mache sisch brääd: links, in dá Midde, quäär, näwenanner. Dòò kummsch de äänfach nidd vòrbei. Die dengge hald: Isch muss stehn, solle's annere aach! Wie im Läwe! De Schade, e paa Segunne meh, halld sisch in Grense, weil: Die Trebb laafd jòò.
Awwer die Daache is die nuffzuss stehn geblieb. Isch midd geladnem Wäänsche uff halwer Heh. Wäänscher devòr unn dehinner. Känn Abhaue meeschlisch, ach nidd mid Gewald. Musch waade, bis de erleesd werrschd. Unn geròòdschd ins Simmeliere: So e Rolltrebb is doch wie's Läwe: Wenn's laafd, laafd's. Unn wenn nidd, dann nidd. Ach wenn de's in beide Fäll beschdefalls ahnschd, wiso. Wie im Läwe!
Es gebbd Leid, die finne iwwerall e Rolltrebb, wo se flink hinbringd, wo se hin wolle. Unn annere finne gaakänn odder solsche, wo stehn odder sogaa in die vákehrd Rischdung laafe. So wie jedz näwedraan der uff dá anner Trebb. Billd sisch in, er misd sisch nur orndlisch vástrawwele, dann kääm á iwwer die Runner-Trebb aach nuff. Peifedeggel! Er land immer widder unne. Wie im Läwe!
Wie isch bei demm Gedangge aankumme, gebbd's er Rugg, das Ding laafd widder, isch kumme in de owwere Stogg. Scheen! Nur eewe, was isch kaafe will, das hann se nidd. Dòò kann die Rolltrebb ruisch laafe! Forr nix nuffgefah, gewaad, geärjerd. Alles forr nix. Wie im Läwe!
Der Mundart-Autor Peter Eckert spricht und schreibt nach 45 Jahren im moselfränkischen Differten nach wie vor rheinfränkisches Sabrigger Pladd.
