Mundartkolumne Saarmòò Jeder had sei Päggelsche?

Peter Eckert erinnert sich an Zeiten, in denen ein Paket-Zusteller noch gereicht hat – und sinniert über den Trend, Dinge im Internet zu bestellen.

Mundartkolumne Saarmòò: Jeder had sei Päggelsche?
Foto: SZ/Robby Lorenz

Halb achd òòmds klingeld‘s. E Hund jääd känner raus bei so Sauwedder. Unn der dääd belle, nidd schelle. Nää, dòò stehd änner im Rään unn fròòd, ob isch e Pageed aanholle – forr Leid, wo‘s dòòmid schunn Huddel genn had. Also: Nää! Obwohl má dòò draus der aarisch lääd dudd.

Dòòzu passd e Schnabsidee vum Owwerboss vun rá Zustellfirma: Weil’s Geschäfd so brummd, käme se in Zukunfd nim‘meh ins Haus, wem’má nidd exdra bleschd. Also: Eerschd bezahle, dass se e Pageed aanholle. Bringe unn orndlisch rausrigge koschd extra. Se misse deirer werre, weil se so gudd vádiene. Kann glawe, wer die Bux mid dá Beiszang zumachd.

Awwer selbschd wenn: Was vum Vádienschd krien die, wo sisch – mid ofd unbezahlde Iwwerstunne noch unn noch – Daa forr Daa abstrawwle, dass jeder sei Päggsche kridd? Die‘s, wenn die Aawed Saldo schlaad, vòr die Diir schmeise, in de Vòrgaade, die Milltonn? Bei vill Gligg mid Zeddel im Briefkaschde, má soll suche, ob’s noch dòò is. E Unding! Gans klaa! Awwer so ebbes kummd vun so ebbes. Wie de Dieselbetruuch: Ohne Drugg vun owwe, die Audo-Planer missde ebbes Unmeeschlisches schaffe, hädde nidd unne die bescheise misse. Is bei Pageede aa nidd vill annaschd.

Had’s nidd mòò e Zeid genn, wo ääner Zusteller gereischd had? Villeischd sogaa vòr „Geiz is geil“ noch aanstännisch bezahld? Billisch, das bezahld in Wòhrhääd es Personal: Mensche, känn Weihnachdswischdel! Schunn‘s ganse Jòhr iwwer – unn vòr Weihnachde eerschd reschd. Das is ääni Seid.

E anneri: Käm wie frihjer ääner Pageedbood mid Audo, der hädd in e paa Orde gudd se duun – unn annere Leid in annere Orde. Tadsäschlisch awwer vádreggd e halb Dudzend LKWs die Lufd in jedem Ord, jeder Stròòs. Umso mehr lossd sisch‘s vun Umweld fòòze.

Unn zu was das alles? Dass má Sache schigge lossd vun weidhär – unn dehämm gehn die Geschäfde kabudd. Vòrschjòhr kunnd má hie noch inkaafe, jedz „Laden zu vermieten“. Unn nòò Weihnachde kumme die näägschde „Geschengge“: Sale – Wir schließen!

Klaa, mansches kridd má nur im Internet. Awwer das laafd wie mid Huhn unn Ei: Was waa se’eerschd? Sache schigge losse, weil má se hie nidd kridd? Odder dass má Sache hie nim’meh kridd, weil die Leid se sisch schigge losse?

Kann all die kald losse, wo devun profidiere. Awwer die, wo draus im Rään stehn...? Jeder had sei Päggelsche? Klingd bisje billisch. Mir driggd sowas (nidd bloos) uff die Weihnachdsstimmung. Nur mir?

Peter Eckert aus Differten schreibt Sabrigger Pladd.

Meistgelesen
Neueste Artikel
Zum Thema
Aus dem Ressort