Mundart Vázischde muss weh duun!

SZ-Kolumnist Peter Eckert würde in der Fastenzeit ja gerne Verzicht üben – doch es gibt da ein Problem.

Vázischde muss weh duun!
Foto: SZ/Robby Lorenz

Am Aschermiddwuch is alles vòrbei? Alles nidd: Die Faschdezeid fangd aan in 25 Daa am 6. März. Derf má das schunn vòr Fasenaachd dengge? Ei jòò! Forr wischdische Endscheidunge is es nie frih genuch – unn schunn gaanidd zu frih.

Wer misch kennd, wääs: Wie de Mond nemme isch ab unn zu ab – unn zu. Das heischd: Jeder Bisse grummeld: „Achdung! Bauch!“ Genuss is das känner. Schigg se faschde in dá Faschdezeid wär also zwei Migge mid ääner Plädsch. Wenn nidd iwwergenaue Leid saan dääde: Nur forr e wenischer strammi Bux, das is doch banal. Das gehd es ganse Jòhr. Weh duun muss es in dá Faschdezeid! Also: Vázischd uff Algohol unn blauer Dunschd!

Wär má mir als Kind so kumm, hädd isch gesaad: Isch bin doch evangelisch! Nur forr mei kadolische Spielkamerade had‘s Äschekreiz bedeid: Faschde bis Oschdere, käm‘meh Gudzjer unn so Zeisch. Mir evangelische Raddeschwänz, wie se uns genennd hann, hädde schnääge dirfe, unn‘s wär nidd gesindischd gewään. Bleed forr misch: Zum Schnääge hann isch sowiso nix gehadd.

Heid is es ähnlisch, nur gans annerschd. Es stimmd zwaa: Rischdisch vázischde, das klabbd villeischd besser mid eschde Genussmiddel wie Wein unn Tuwwak. Trodzdemm: Isch kam’má es Raache unn Saufe nidd abgewehne. An Insischd fähld‘s nidd. Das ään schad Bronschje unn Herzkransgefääse, das anner dá Lewwer, benewweld de Kobb unn koschd e Puddsche Hirnzelle.

Also ròòde die Leid: Dann vásuch’s doch wenischdens mid me bissje wenischer in dá Faschdezeid. Gudd gesaad! Vázischde uff Niggodin unn Algohol schaff isch mid links. Awwer: Ob Faschdezeid odder nidd: Gewehn dá mòò es Raache ab, wenn de zeidläwens Nichtraucher waaschd!

Unn das halwe Glas Sekd in dá Neijòhrsnaachd unn die paa Tribse Wein bei offizielle Zwangs- unn Pro-Forma-Aanläss, dòò krien isch pro Jòhr känn Flasch sesamme. Selbschd unser Freinde stelle má seid Jòhrzehnde freiwillisch Sprudel hin, weil se’s uffgenn hann. Wie soll má dòò de Algoholkonsum sengge? Selbschd wenn isch die ään Flasch bleiwe losse: Ob das es Hääbsche fedd machd? Isch hann gewaldische Zweifel. Das bringd also nix. Awwer was soll isch mache, wenn isch unbedingd faschde unn mid aller Gewald vázischde will? E Rieseproblem! Was bin isch froh, dass es jedz ball widder Audofaschde gebbd. Ään Gligg! Dòò bin isch debei. Vázischde muss weh duun! Vun Aschermiddwuch bis Ooschdere bleibd’s Audo in dá Garaasch! Isch fahre Taxi!

Peter Eckert schreibt Sabrigger Pladd.

Meistgelesen
Neueste Artikel
Zum Thema
Aus dem Ressort