Mundartkolumne Bekannde Fluuchobjeggde
Das mir midd der Nadduur unn allem, was doo drinn so kreucht unn fleucht, e bissje besser umgehn missde, das hadd sich joo jedds langsam erummgesproch. Schunn im eichene Indresse. Was mer zum Beispiel vunn de Biencher so heerd, doo kried mer ball Angst.
Unn was die einheimische Sing-Veschel aangeht, doo geheere die noch nidd direggd zu de bedroode Arte, awwer sie mache sich doch langsam rarer. Hannse jedenfalls bei de Zählunge in de leddschde Johre feschdgstellt. Anfang Januar hann die Naddur- unn Vochelschiddser widder so e Aggzioon aangereecht, wo mer unser gefiederte Freinde hadd solle zähle.
Was gar nidd äänfach iss. Weil die joo naddurgemääs eejer unorganisiert durjeanner flieje. Unn nidd uff Kommando stillhalle. Am beschde, so kinnd mer denke, lossd sich noch die Atzel zähle. Weil die zu de sogenennde Stand-Veschel geheert. Awwer das hääscht joo nur, dasse im Winder nidd in Urlaub flieht unn scheen dehemm bleibt. Wer soll dann aach sunschd hie die Glosse schreiwe.
Aus verständliche Gründe werre desweeje nadierlich aach die Zuuch-Veschel nidd mitgezählt. Unn aach nidd die ganze komische Veschel, die wo bei uns doo ihr Unwese treiwe. Ich will als Atzel kää Neschd beschmuddse, awwer de Schmutz- unn de Schmierfink, de Schluckspecht, de Rohrspatz unn die Spottdrossel sinn kää Ruhmesblatt fier die Vochelwelt. Allerdings muss mer bedenke, dass de Mensch manche Veschel so domestizierd hadd, dasse noch nidd emool meh flieje kinne. Mir hann gudd singe: Ich wollt ich wär ein Huhn. Wammer das Huhn nidd gefrood hann, wo im schlimmschde Fall im Dibbe lande duud. Wies in dem Schiddelreim hääscht: Wir aßen heut den Suppenhahn, den wir noch gestern huppen sahn.
